Li valors istoriqui e tradicionali dau movement occitan son:
- la defensa dei drechs dau pòble e dei interès dau país,
- la democracia,
- l’umanisme,
- lo respècte de l’environament.
Son li valors dei tres grands pensadors de l’occitanisme que son Frederic Mistral, Robèrt Lafont e Francés Fontan. Son li valors de l’Assemblada Occitana.
Dins lo movement occitan, l’Assemblada Occitana encoratja l’expression de toti li tendéncias politiqui que son clarament democratiqui e umanisti, per exemple:
- l’ecologisme,
- l’anarquisme,
- lo comunisme e lo socialisme democratics,
- la socialdemocracia,
- lo centrisme,
- lo liberalisme umanista,
- lo conservatisme umanista…
Per tant, ramentam que certani tendéncias politiqui rèstan incompatibli amb li valors de l’occitanisme. Refudam en particular:
- Toti li formas d’òdi en generau (racisme, chauvinisme, masclisme, omofobia…).
- L’extrèma drecha (nacionalpopulisme, neofaissisme, neonazisme, ideologia roja-bruna…).
- Certans corrents totalitaris que deforman lo comunisme (stalinisme, maoïsme, juche nòrd-corean, interpretacions autoritàrias del leninisme e del trotskisme).
- Lo fanatisme religiós.
- Lo conservatisme ultrareaccionari que s’opausa au feminisme, ai omosexuaus e a la diversitat religiosa e sociala…
- Lo capitalisme sauvatge que fida lo poder a de grandi bancas e a de lobbys.
- Li tecnocracias qu’escapan au contraròtle dei ciutadans.
Certani personas e organizacions utilizan la lucha contra d’injustícias (capitalisme sauvatge, imperialismes…) coma pretèxt per justificar toti menas de crimes e de derivas sectàrii e religioï. Aqueli posicions son de segur inacceptabli.