by L’Assemblada Occitana País Niçard felicita la República de Niça dins la celebracion de la jornada de la Dedicion a Savòia de 1388 davant l’estàtua de Catarina Segurana, lo diménegue 28 de setembre passat.
La Dedicion, eveniment fondamental de l’istòria dau País Niçard, marca tant la separacion amb Provença coma la naissença d’una particularitat niçarda pròpria. Consideram essencial de la si far remembrar e de la celebrar cada an.
Saludam tanben l’iniciativa de rebatejar la Plaça Ísola de Beutat amb lo nom de Plaça Catarina Segurana. Ja en 2019, la República de Niça avia renomenat l’ancian Cai Cassini — que siguèt injustament dedicat a Napoleon lo Ir per la comuna de Niça — en Cai Garibaldi. Aquela accion simbolica siguèt tanben saludada per nautres.
Exprimissèm tanben lo nòstre sosten a la República de Niça e au sieu president Cristòu Daurore, victima tròp sovent de pressions inacceptabli per part de certans responsables locaus.
E mai s’adoptam pas exactament la mesma estrategia, reconoissèm lo trabalh considerablament eficaç de conscientizacion menat per la República de Niça, e la podèm solament felicitar.
En particular, metèm en avant:
- La moneda locala lo “Niçard”, que s’es difusada amb succès dins mai de vint comèrcis dau País Niçard.
- Lo projècte de carta d’identitat niçarda.
- La preséncia publica e mediatizada de la causa niçarda per l’organizacion de manifestacions visiblas.
Aqueli iniciativas contribuisson a reactivar la memòria istorica e a afortir la consciéncia collectiva de l’occitanitat dau nòstre País Niçard.
